كتبت : ناهد علي
قال الفنان محمد سليمان، إنّه زوج ابنته بنفس الطريقة التي تربى بها على يد والديه، موضحًا: “شفتهم ازاي بيجوزوا بناتهم وإنهم بيدوروا على رجالة، ولي شقيقتان وأنا أصغرهما، وشفت كل حاجة بتتحسب ازاي، لكن المهم هو البشر مش المادة”.
وأضاف محمد سليمان، في مداخلة هاتفية مع الإعلامية بسمة وهبة مقدمة برنامج “90 دقيقة”، على قناة المحور، خلال حديثها عن موضوع الفقرة، وهو أشياء يمكن أن يتم الاستغناء عنها في تجهيزات الزواج: “عملت زي أبويا الظبط في جوازة بنتي، والمهم إنه يهتم بها ويحافظ عليها”.
وتابع: “مش هقول لزوج بنتي يوفر لها نفس المستوى بتاعي، لأني وفرته لها بعد سنوات كثيرة من العمل والكفاح، لكنه قدامه وقت يوصل لده ويكمله، والعريس مش مطالب يبقى معاه كل حاجة، لأن لو معاه كل حاجة يبقى أبوه هو اللي مديهاله”.
وتابع ايضاً: “المشكلة إن الأب بيبقى عاوز بنته تعيش في نفس المستوى اللي معيشها فيه عشان متتعبش، المفروض البيوت تفكر في المادة أخر حاجة بعدما نتأكد إن العريس محترم وأهله محترمين”، مشيرًا إلى أنّ زوجته وافقت على مبدئه في تزويج ابنته، وهو أن تختار شخصا تحبه ويكون قادرا على إسعادها.
ويذكر ان: الفنان محمد سليمان، قال انه قبل أن يزوج ابنته، سأل أصدقائه عن طريقة التعامل مع العريس الذي تقدم لخطبتها، وكان ردهم: “ده احنا هنطلع عينه”.
وأضاف خلال لقائه ببرنامج “راجل و2 ستات” الذي يذاع على قناة “on”: “أنا طيب، بس أنا منطقي، مش بحب أتكلم في موضوعات مش مفهومة، 1+1 يساوي 2، أنا محطتش شروط في جواز بنتي، لا قائمة ولا فرضت عليه مهر ولا الكلام ده كله، أنا جوزتها بالطريقة الإسلامية”.
وقال: “الطريقة الإسلامية، أنا ببص للولد نفسه، مش بيهمني مين أبوه ولا معاه فلوس ولا ممعهوش، المهم الولد متربي ولا مش متربي، ده اللي هيفرق في حياته مع بنته، ممكن يكون إنسان مش كويس وبيجيب لبنتي كل حاجة، العادات والتقاليد اللي بنفكر فيها، مش بتخدم أولادنا على قد ما بتمثل قيود عليهم”.
